A Deputación de Pontevedra presenta as subvencións e a súa convocatoria para o ano 2024, para desenvolver proxectos, programas e actividades centrados en conseguir a igualdade entre mulleres e homes e loitar contra a violencia machista na provincia de Pontevedra durante o ano 2024.
Beneficiarios
Enténdense como entidades beneficiarias aquelas sen ánimo de lucro cos seguintes requisitos:
- Ter a súa razón social ou unha delegación na provincia de Pontevedra.
- Carecer de fins de lucro.
- Estar inscritas na Área de Igualdade do Rexistro Único de Entidades Prestadoras de Servizos Sociais da Xunta de Galicia (RUEPSS), recollido no Decreto 254/2011, de 23 de decembro, polo que se regula o réxime de rexistro, autorización, acreditación e inspección dos servizos sociais en Galicia, na data final de presentación de solicitudes.
- Non estar incursas en ningún dos supostos de incapacidade ou incompatibilidade para a percepción de axudas ou subvencións públicas nin incorrer en ningún dos casos de prohibición para percibir subvencións recollidos na lei.
- Estar ao corrente das obrigas tributarias coa Axencia Estatal Tributaria, coa Facenda galega, coa Seguridade Social e coa Deputación de Pontevedra.
- Que a actividade desenvolvida pola entidade cumpra as obrigas establecidas na Lei orgánica 3/2007, de 22 de marzo, para a igualdade efectiva de mulleres e homes; no Decreto lexislativo 2/2015, de 12 de febreiro, polo que se aproba o Texto refundido das disposicións legais da Comunidade Autónoma de Galicia en materia de igualdade; na demais lexislación vixente en materia de igualdade e no exercicio dos dereitos fundamentais das persoas.
Accións subvencionables
Para estas subvencións inclúense:
- Proxectos e actividades de sensibilización, formación e prevención da violencia de xénero.
- Proxectos de atención integral a vítimas de violencia machista, fillas, fillos e persoas dependentes ao seu cargo.
- Programas e actuacións destinados a mulleres en situación de especial vulnerabilidade e con singulares dificultades.
- Proxectos e actividades que favorezan e fomenten a igualdade entre mulleres e homes.
- Proxectos encamiñados a mellorar a formación e a orientación para o emprendemento e a inserción laboral das mulleres.
- Accións dirixidas a crear redes e servizos de apoio que favorezan a conciliación da vida persoal, familiar e laboral.
- Campañas de difusión e sensibilización da cidadanía en materia de igualdade.
As cales deberán realizarse durante 2024 e rematar antes do 31 de decembro de 2024.
Ademais otorga axuda ós gastos subvencionables aqueles que se inclúen en proxectos, programas e actividades centrados en conseguir a igualdade entre mulleres e homes e loitar contra a violencia machista.
Gastos non subvencionables
Quedan excluídas desta convocatoria e, polo tanto, non serán obxecto de subvención as seguintes actuacións:
- Proxectos, programas ou actividades que recibisen subvención no mesmo exercicio a través doutras convocatorias de subvencións da institución provincial.
- Actuacións incluídas no catálogo de actividades do programa “+Xuntas” da Deputación de Pontevedra.
- Proxectos que impidan o desenvolvemento do dereito das mulleres a unha vida libre de violencia, que non favorezan a súa autonomía e o seu dereito a decidir libremente e sen coaccións sobre a súa sexualidade, o seu corpo e a súa maternidade, ou que, en definitiva, non lles permitan construír os seus propios proxectos vitais.
- Gastos correntes de funcionamento das entidades (luz, auga, teléfono e alugueiro).
- Gastos relativos a actividades lúdicas, culturais, deportivas, de lecer e tempo libre ou turísticas e a servizos de restauración e cátering que non se correspondan co obxecto do programa.
- Gastos financeiros, de asesoría xurídica e financeira ou de natureza análoga.
- Gastos relativos á adquisición de equipamento ou de material inventariable (equipamentos informáticos, mobiliario e outros).
Incompatibilidades e concorrencia
Estas subvencións son compatibles:
- Coa percepción doutras subvencións, axudas ou ingresos para a mesma finalidade procedentes de calquera Administración distinta da Deputación de Pontevedra, ente público ou privado. En ningún caso o conxunto das axudas recibidas poderá superar o 100 % do custo da actividade ou do
proxecto subvencionado.
- Non poderán financiarse mediante outras subvencións outorgadas polo réxime de concesión directa ou concederse por outros servizos do organismo provincial para a mesma finalidade no exercicio de 2024.
As subvencións ás que se refire esta convocatoria son incompatibles con outras subvencións da Deputación de Pontevedra do Servizo de Igualdade.
A xestión e a concesión destas axudas realizaranse mediante o procedemento de concorrencia competitiva, de acordo cos seguintes principios:
a) Publicidade, concorrencia, obxectividade, transparencia, igualdade e non discriminación.
b) Eficacia no cumprimento dos obxectivos fixados pola Administración outorgante.
c) Eficiencia na asignación de efectivos e na utilización de recursos públicos.
Contía
- A contía prevista para esta convocatoria, con cargo á aplicación 24/250.2315.480.01 do Orzamento xeral da Deputación para o ano 2024, ascende a 200.000€.
- A subvención concedida a cada entidade non poderá superar os 7.000€.
Prazo
O prazo de presentación de solicitudes comeza o 9 de febreiro de 2024 e finaliza o 8 de marzo de 2024.
Máis información
Consulta as BASES REGULADORAS DE LA CONVOCATORIA DE SUBVENCIONES DIRIGIDAS A LAS ENTIDADES DE INICIATIVA SOCIAL SIN FINES DE LUCRO PARA EL FOMENTO DE LA IGUALDAD DE OPORTUNIDADES Y LA LUCHA CONTRA LA VIOLENCIA DE GÉNERO PARA EL AÑO 2024
Para calquera información a maiores sobre esta convocatoria ou se precisas axuda na tramitación, podes poñerte en contacto co noso Departamento de Apoio ás Asociacións, chamando ao teléfono 986 42 33 66.
O contido desta presentación ten unicamente fins informativos; en ningunha circunstancia o contido desta publicación poderá substituir a información proporcionada nos documentos oficiais.
