A programación musical arrancará o sábado 22 ás 20:30 coa actuación dos Festicultores Troupe. A continuación subirase ao escenario o grupo Dakidarría. As actividades do domingo arrancará ás 20:00 horascun obradoiro interactivo sobre as herbas de San Xoán, seguiralle o espectáculo infantil e familiar de Hípica Celta a partir das 21:00 horas e xa as 22:30 terá lugar o espectáculo “A queima da fachada”, tamén por Hípica Celta. Ás 00:00 horas procederase ao acendido das fogueiras (unha para adultos e outra para público infantil), e ás 00:30 horas a Orquestra Claxxon porá o broche de ouro ao San Xoán deste ano. Ademais, o día 23 de xuño a partir das 21:00 horas haberá sardiñada e churrascada a prezos populares.
Dende o Concello destacan que se trata dun San Xoán inclusivo que contará co punto informativo “A que xogas?”, co que se pretende concienciar á mocidade sobre os efectos negativos do consumo de alcol e drogas. Poranse en marcha ademais diferentes medidas para garantir que toda a veciñanza desfrute por igual: haberá cascos anti-ruído, unha plataforma para que as persoas con mobilidade reducida poidan desfrutar dos concertos e, como gran novidade, as fogueiras estarán adaptadas para que as persoas con mobilidade reducida e con diversidade funcional tamén poidan facer o tradicional salto de San Xoán.
