Proximamente nova apertura de Aspanaex en Coia para que as persoas con discapacidade intelectual teñan por fin onde vivir e ser atendidos segundo as súas necesidades.
Aspanaex, a asociación que traballa dende 1963 en favor das persoas con discapacidade intelectual do área de Vigo, espera abrir a finais deste ano ou comezos do próximo a residencia que construiu na rúa Porriño, no edificio que antigamente ocupaba o Centro de Especialidades de Coia.
Neste intre o edificio está completamente rematado, con todo o mobiliario instalado e cos servizos que se necesitan, e tamén dispón da licencia de primeira ocupación do Concello. O trámite que lles queda por realizar é o concerto de prazas coa Consellería de Política Social. A Xunta ten previsto convocar un concurso ao que se presentará Aspanaex para concertar prazas públicas na súa residencia. O centro ten capacidade para 50 usuarios aínda que supoñen que co concerto cubrirán entre 25 e 30.