AXUDAS PARA INVESTIMENTOS DE TRANSFORMACIÓN DOS PRODUTOS PESQUEIROS E DE ACUICULTURA

Obxectivo

Conceder, en réxime de concorrencia competitiva, axudas  destinadas a realizar investimentos para pemes  e entidades asociativas do sector transformador dos produtos da pesca e acuicultura que contribúan á seguridade alimentaria na Unión Europea, fomentando unha pesca e acuicultura sostibles desde unha perspectiva ambiental, socialmente responsable, baseada no coñecemento e competitiva.

Beneficiarios e requisitos

Poderán ser persoas beneficiarias as persoas físicas, xurídicas, pluralidade de persoas físicas, agrupacións ou entidades sen personalidade xurídica ou comunidades de bens que cumpran os seguintes requisitos:

1. Ser unha peme do sector de transformación dos produtos pesqueiros e da acuicultura ou ser unha entidade asociativa do sector transformador dos produtos pesqueiros e acuícolas, legalmente constituídas e inscritas no correspondente rexistro, e que cumpran o requisito de ser peme.
2.  Non ter pendente de pagamento ningunha obriga por reintegro de subvencións nin sanción firme pendente de pagamento por infracción da normativa marítimo-pesqueira. 
3. Non incorrer en ningunha das circunstancias previstas no artigo 10 da Lei 9/2007, do 13 de xuño, de subvencións de Galicia, que impida obter a condición de beneficiario da axuda.
4. Non incorrer en ningunha das circunstancias previstas no artigo 13 da Lei 38/2003, do 17 de novembro, xeral de subvencións, que impida obter a condición de beneficiario da axuda.
5. Non atoparse nalgún dos supostos establecidos no número 1, letras a) e b), e o número 3 do artigo 11 do Regulamento (UE) nº 2021/1139 do Parlamento Europeo e do Consello, do 7 de xullo de 2021.
6. Ter capacidade administrativa, financeira e operativa para cumprir as condicións da axuda.
7. Estar en posesión das preceptivas concesións, autorizacións, permisos ou licenza para levar a cabo os investimentos previstos ou ter presentadas as solicitudes destas. En todo caso, os documentos presentados para a solicitude da subvención deberán ser copias dos presentados para a obtención dos permisos.
8. Antes de que se dite a proposta de resolución de concesión, deben estar ao día nas obrigas tributarias e coa Seguridade Social e non ter pendente de pagamento ningunha débeda, por ningún concepto, coa Administración pública da Comunidade Autónoma de Galicia.
9. Coa solicitude (anexo I), xuntarase unha declaración responsable por parte do solicitante, do seu representante ou apoderado do cumprimento dos requisitos establecidos nos puntos 2 ao 6.

Accións subvencionables

Serán subvencionables aquelas actividades que entre a súa finalidade se atope: 

1. Fomentar a calidade e o valor engadido dos produtos.
2. Aumentar a eficiencia enerxética, reduzan o impacto no ambiente ou melloren a mobilidade sostible da distribución de produtos da pesca.
3. Mellorar a seguridade, a hixiene, a saúde e as condicións de traballo.
4. Favorecer a economía circular mediante a prevención; a optimización de procesos; a minimización dos residuos (ecodiseño e ecoeficiencia); o aproveitamento comercial das capturas non desexadas e subprodutos; o uso de descartes para o desenvolvemento de subprodutos; a transformación de capturas de peixe comercial que non poidan destinarse ao consumo humano, e a transformación de subprodutos obtidos das actividades principais de transformación.
5. Fomentar a transformación de produtos da acuicultura ecolóxica en virtude dos artigos 7 e 8 do Regulamento (CE) nº 2018/848.
6. Fomentar a adaptación dos operadores aos requisitos de cumprimento e certificación, de acordo co Regulamento (UE) nº 1151/2012 do Parlamento Europeo e do Consello, ou o Regulamento (UE) nº 2018/848 no relativo a produtos de acuicultura ecolóxica.
7. Dar lugar a novos e mellores produtos e procesos, ou a sistemas de xestión e organización perfeccionados en materia de transformación dos produtos.

Gastos subvencionables

• Os investimentos que acaden a finalidade do artigo 3 poderán ser obxecto de subvención.
• Tamén será subvencionable o gasto derivado da certificación ou da elaboración do informe dun auditor inscrito no Rexistro Oficial de Auditores de Contas (ROAC), no caso de subvencións de importe superior a 30.000,00 € nas cales non sexa posible presentar conta de perdas e ganancias abreviada, así como os custos que resulten dos proxectos e asesoramentos necesarios para acometer o investimento produtivo obxecto de financiamento (estudos de impacto ambiental, informes técnicos, xurídicos, etc.).
• De ser o caso, serán subvencionables os gastos dos proxectos técnicos, que non poderán superar o límite do 12 % do investimento máximo subvencionable.

Para a anualidade de 2024: só se admitirán aqueles gastos correspondentes á acción subvencionable que fosen efectivamente pagados dentro do período comprendido entre a data da visita do persoal técnico para realizar a certificación de non-inicio ou certificación de non-inicio anticipada, de ser o caso, e a data límite de xustificación establecida na resolución de concesión da axuda ou a súa modificación, de ser o caso.

Para a anualidade de 2025 admitiranse os gastos efectivamente pagados dentro do período comprendido entre a data da visita do persoal técnico para realizar a certificación de non-inicio ou certificación de non-inicio anticipada, de ser o caso, e a data límite de xustificación da segunda anualidade.

Non serán subvencionables

• O imposto do valor engadido (IVE) nin outros impostos recuperables.
• As transferencias de propiedade dunha empresa.
• Os gastos de reposición de elementos, infraestruturas, instalacións e equipamentos, salvo que a nova adquisición supoña unha mellora substancial. Tampouco serán subvencionables os gastos orixinados por obras de mantemento e reparacións.
• As adquisicións de elementos, infraestruturas, instalacións e equipamentos de segundo uso e posteriores.
• A adquisición de terreos por un custo superior ao 10 % do total de gasto subvencionable da operación de que se trate, sempre que exista unha relación directa entre a compra e os obxectivos da operación; no caso de zonas abandonadas e daquelas cun pasado industrial que comprendan edificios, este límite aumenta ata o 15 %.
• A compra de edificios ou locais se estes foron subvencionados nos últimos 10 anos.
• As obras non vinculadas co proxecto de investimento: vivendas, comedores, obras de embelecemento, equipamentos de recreo e semellantes.
• A urbanización que non estea relacionada coa actividade do proxecto que se pretende financiar.
• A adquisición de elementos e todo tipo de bens que non sexan pagados por transferencia bancaria ou aqueles pagados mediante préstamos de entidades provedoras.
• O custo de elementos de transporte que no estean directamente relacionados coa operación.
• Os xuros da débeda.
• No ámbito da innovación:

• As adaptacións ás necesidades dun cliente especifico que non presenta características significativamente diferentes aos produtos fabricados para outros clientes.
• Os cambios de deseño que non modifican a función ou as características técnicas do ben/servizo.
• Sistemas de fabricación ou loxística similares aos xa en uso.

Incompatibilidades e concorrencia

Os gastos cofinanciados serán compatibles con outras liñas de axudas, sempre que a suma de todas elas non supere o límite da intensidade máxima de axuda pública prevista no artigo 41 do Regulamento (UE) nº 2021/1139 do Parlamento Europeo e do Consello, de 7 de xullo de 2021.

Non obstante, a obtención concorrente de axudas outorgadas para a mesma finalidade polas administracións ou entes públicos ou privados, nacionais ou internacionais, cando o importe total das subvencións percibidas por cada persoa beneficiaria supere os límites que se indican no número anterior, dará lugar á redución proporcional que corresponda no importe das subvencións, ata axustarse a ese límite na última subvención que se conceda.

Criterios de valoración

Para avaliar as solicitudes utilizaranse catro categorías de criterios de selección: xerais, horizontais ambientais e sociais, específicos de viabilidade técnica e/ou económicos, e por último específicos polo tipo de actividade:

1. Criterios de selección xerais (30 %).
2. Criterios horizontais ambientais e sociais (20 %).
3. Criterios de viabilidade técnica e económicos (20 %).
4. Criterios específicos polo tipo de actividade (30 %).

Se queres saber máis acerca destes criterios, clica na seguinte ligazón.

Contía

As axudas concederanse con cargo á aplicación orzamentaria 46.02.723B.770.6, código de proxecto 202300191, correspondentes á Consellería do Mar, e o importe total máximo das subvencións que se concedan nos devanditos exercicios será de 19.000.000,00 €, distribuídos nas seguintes anualidades:

• Anualidade 2024: 9.000.000,00 €.
• Anualidade 2025: 10.000.000,00 €.

O importe fixado, así como as aplicacións a que se impute, poderase ampliar no caso de que exista crédito dispoñible derivado dunha xeración, ampliación ou incorporación de crédito.

Estas axudas contan co financiamento do  FEMPA nun 70 % (prioridade 2: fomentar as actividades sostibles de acuicultura, así como a transformación e comercialización dos produtos da pesca e a acuicultura, para contribuír así á seguridade alimentaria da Unión; obxectivo específico 2.2: promover a comercialización a calidade e o valor engadido dos produtos da pesca e a acuicultura, así como a transformación de ditos produtos; tipo de actividade 2.2.4: investimentos en comercialización e transformación), e do Estado membro (C.A. de Galicia) nun 30 %.

Prazo

O prazo de presentación de solicitudes comezará o 19 de xuño de 2024  e rematará o 18 de xullo de 2024.

Máis información

Acceso ó trámite de procedemento

       Código de procedemento: PE201B

Consulta a ORDE do 6 de xuño de 2024 pola que se establecen as bases e se regula o procedemento para a concesión, en réxime de concorrencia competitiva, de axudas para investimentos en pemes de transformación dos produtos pesqueiros e de acuicultura, cofinanciadas co Fondo Europeo Marítimo, de Pesca e de Acuicultura (FEMPA), e se convocan para o ano 2024 (código de procedemento PE201B).

Para calquera información a maiores sobre esta convocatoria ou se precisas axuda na tramitación, podes poñerte en contacto co noso Departamento de Apoio ás Asociacións, chamando ao teléfono 986 42 33 66.

O contido desta presentación ten unicamente fins informativos;  en ningunha circunstancia o contido desta publicación poderá substituir a información proporcionada nos documentos oficiais.